Në një intervistë të veçantë dhënë për “Opinion”, transmetuar mbrëmjen e djeshme, kreu i Partisë Demokratike, Lulzim Basha, ka treguar ndër të tjera se si mori vendimin për të lënë mundësitë që kishte dhe për të ardhur në Shqipëri.
Kreu i opozitës ka rrëfyer se teksa kishte vetëm një vit që ishte martuar, së bashku me bashkëshorten, vendosi që të linte punën e ofruar në një institucion në Hagë, të linte dhe ftesën për të punuar për OKB-në dhe të kthehej në Shqipëri për t’iu bashkuar Partisë Demokratike.
Një pjesë nga intervista
Fevziu: Ju ftuan apo vendosët të vinit vetë z.Basha?
Basha: Pa dyshim edhe jam ftuar, por vendimin e kam marrë unë. Vendimin e kam marrë unë bashkë me bashkëshorten time, kishim një vit që ishim martuar, në vitin 2004 ishim martuar. E kam shpjeguar para disa vitesh por po e kthej prapë në vëmendje. Isha para disa vendimeve, kisha një ftesë për të punuar në një institucion ndërkombëtar në Hagë që sapo themelohej, kisha një ftesë për të punuar në New York, po kështu për Organizatën e Kombeve të Bashkuara dhe një ftesë të përsëritur nga opozita, nga Partia Demokratike, nga Sali Berisha, për t’iu bashkangjitur përpjekjes opozitare dhe me thënë të drejtën, shpirti më qante prej vitesh…
Fevziu: Gjatë kohës që ishe në Holandë, ishe i lidhur me Shqipërinë?
Basha: Në mënyrën më intensive.
(XH.A/SHUPLAKA)
