Basha uron ”Kurban Bajramin”: Mendimet e mia shkojnë për ata që i kanë tryezat bosh

Urimeve për festën e Kurban Bajramit iu është bashkuar sot dhe kreu i PD-së Lulzim Basha.

Pas vizitës në Komunitetin Mysliman Shqiptar ai deklaroi se festa e Kurban Bajramit është “ditë zotimi dhe kujtimi për përgjegjësitë e rënda dhe të rënduara të politikës”.
“Uroj të gjithë besimtarët myslimanë gëzuar festën e Kurban Bajramit. Kjo është një ditë solidariteti mes njerëzve, dita kur individi dhe shoqëria bashkohen në përkujdesjen ndaj më të pamundurve. Mendimet e mia janë për ata që shumicën e vitit i kanë tryezat bosh, për të moshuarit, për të sëmurët dhe për fëmijët”, tha Basha.

“Lutja ime është për një shoqëri më solidare, me më shumë mundësi, që jo vetëm ditën e Kurban Bajramit, por çdo ditë tryezat e familjeve shqiptare të jenë plot. Prandaj kjo është edhe një ditë zotimi dhe kujtimi për përgjegjësitë e gjithësecilit në raport me një shoqëri më të drejtë e në veçanti për përgjegjësitë e rënda dhe të rënduara të politikës”, shtoi kreu i PD-së.

(E.K/SHUPLAKA)