Ndërkohë që kryeministri Edi Rama dhe kreu i opozitës Lulzim Basha po diskutonin në Pallatin e Kongreseve për të vendosur për fatin e zgjedhjeve, atmosfera në çadrën e ngritur përballë selisë së Kryeministrisë duket mjaft e tensionuar.
Të rinj e të moshuar, burra dhe gra, të gjithë në pritje për të zbuluar se çfarë do ndodhë me ta. A ia vlejti sakrifica e tyre duke u ngujuar në çadër ditë edhe natë, që prej 18 shkurtit? A do ketë më në fund zgjedhje të lira dhe të ndershme? Kjo është pyetja që të gjithë këta protestues kërkojnë t’i mësojnë përgjigjen.
Por përgjigjen do ta mësojnë vetëm pasi Rama dhe Basha të deklarojnë publikisht se çfarë kanë vendosur, jashtë informacioneve që qarkullojnë nëpër media përmes burimeve.
”Shuplaka” mësoi nga burimet se Rama dhe Basha po diskutonin rreth detajeve të papërfunduara ditën e djeshme dhe po detajojnë në letër pikat e marrëveshjes, mes tyre dhe data e saktë e zgjedhjeve. Pavarësisht se asnjëri nuk ka deklaruar asgjë, ndërkohë në media qarkullon se data është vendosur 25 qershori.
Sot nuk është diskutuar për emra konkretë, që pritet t’i propozojë Basha, lidhur me pozicionet e Zv.kryeministrit, ministrave dhe zv.ministrave. Nga ana tjetër, mësohet se çadra e demokratëve do të mbyllet shpejt, me t’u detajuar në letër marrëveshja, duke marrë garancitë maksimale për vënien në jetë të paketës ”McAllister Plus”. (D.D/Shuplaka)
[ngg_images source=”galleries” container_ids=”1840″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
Discussion about this post