Bashar al-Assad, në deklaratën e tij të parë që nga rënia e regjimit të tij në Siri javën e kaluar, ka mohuar se e kishte planifikuar largimin e tij nga vendi. Në një reagim të gjatë në Telegram, Al Assad tha se u largua në Rusi nga baza Khmeimim në Siri natën e 8 dhjetorit, kur u vu nën sulme me dronë.
“Largimi im nga Siria as nuk ishte planifikuar dhe as nuk ndodhi gjatë orëve të fundit të betejave, siç kanë pretenduar disa. Përkundrazi, kam qëndruar në Damask, duke kryer detyrat e mia deri në orët e para të së dielës, 8 dhjetor 2024. Ndërsa forcat terroriste depërtuan në Damask, unë u zhvendosa në Lattakia në koordinim me aleatët tanë rusë për të mbikëqyrur operacionet luftarake. Pas mbërritjes në bazën ajrore Hmeimim atë mëngjes, u bë e qartë se forcat tona ishin tërhequr plotësisht nga të gjitha linjat e betejës dhe se pozicionet e fundit të ushtrisë kishin rënë.”, thotë ai.
Më pas ai e përshkruan veten si personin që refuzoi ta përdorte Sirinë për përfitime personale, si personi që qëndroi me ushtrinë pranë popullit të tij gjatë viteve të errëta të luftës. Sipas tij, ai kurrë nuk kërkoi një zgjidhje për përfitime personale, pasi ai e shihte veten si “ruajtës i një plani kombëtar”.
“Kam pasur një besim të palëkundur në vullnetin dhe aftësinë e tyre për të mbrojtur shtetin, për të mbrojtur institucionet e tij dhe për të mbështetur zgjedhjet e tyre edhe në momentin e fundit”, nënvizon ai.
Ai përfundoi deklaratën duke thënë se shpreson se “Siria do të jetë edhe një herë e lirë dhe e pavarur’.
“Kur shteti bie në duart e terrorizmit dhe humbet mundësia e kontributit kuptimplotë, çdo pozicion bëhet i zbrazët nga qëllimi, duke e bërë detyrën e tij të pakuptimtë. Kjo në asnjë mënyrë nuk e pakëson ndjenjën time të thellë të përkatësisë ndaj Sirisë dhe popullit të saj – një lidhje që mbetet e palëkundur nga asnjë pozicion apo rrethanë. Është një lidhje plot shpresë se Siria do të jetë sërish e lirë dhe e pavarur”, përfundon al Assad.
