“Bashkë Fitojmë” depoziton në SPAK denoncimin për Dallëndyshe Bicin: Një ditë para zgjedhje po shpërndan legalizime në këmbim të votës

Një tjetër denoncim për thyerje të heshtjes zgjedhore nga radhët e qeverisë ka ndodhur gjatë ditës së sotme.

Koalicioni “Bashkë Fitojmë” ka kallëzuar penalisht në SPAK, drejtoreshën e Agjencisë Shtetërore të Kadastrës (ASHK), Dallëndyshe Bici, e cila po shpërndan për qytetarët legalizime në këmbim të votës.

Në godinën e ASHK janë regjistruar nga pamje filmike të gazetarëve, një pjesë e konsiderueshme e qytetarëve të hynin në mënyrë të fshehtë nga pjesa e pasme, garazhi.

Qytetarë të pyetur janë shprehur se kanë shkuar në institucionin në fjalë, pasi janë thirrur në telefon nga zyrtarët e institucionit.

“Bashkë Fitojmë” pas verifikimeve dhe rezultateve arriti në konkluzinin se veprimi i kryer më sipër është një vepër e pastër penale nga drejtuesit dhe punonjësit e institucionit.

Ata i bëjnë thirrje SPAK për regjistrimin dhe fillimin e një procedimi penal ndaj personave të kallëzuar, si dhe kryerjen e të gjitha veprimeve hetimore dhe sqarim sa më të saktë të rrethanave më sipër”, njofton zyra e shtypit të PD-së.

Më herët, ishte Tedi Blushi ai që denoncoi ministrin Niko Peleshi për fushatë ditën e heshtjes zgjedhore.

Deklarata:

Partia Demokratike ka kallëzuar sot penalisht në SPAK, drejtoreshën e Agjencisë Shtetërore të Kadastrës (ASHK), Dallëndyshe Bici.

Nga pamjet e filmuara nëpërmjet mediave televizive, rezultoi se drejtoresha e ASHK në Tiranë përfshirë në një skandal, pikërisht një ditë para zgjedhjeve të 14 majit. Agjencia e drejtuar nga Dallëndyshe Bici po shpërndan për qytetarët legalizime në këmbim të votës.