Në vijim të bashkëpunimit të ngushtë dhe afatgjatë mes Shqipërisë dhe Gjermanisë në fushën e sigurisë, Zyra Federale Kriminale Gjermane (BKA) i ka dhuruar Policisë së Shtetit një donacion me pajisje të teknologjisë së lartë, në vlerën e rreth 100 000 eurove. Pajisjet përfshijnë kompjuterë të fuqishëm dhe monitorë profesionalë, të cilët do të përdoren nga Drejtoria e Inteligjencës dhe Arkivës Kriminale.
Donacioni u përshëndet gjatë një ceremonie të zhvilluar në ambientet e Drejtorisë së Përgjithshme të Policisë së Shtetit. Në këtë aktivitet morën pjesë Drejtori i Përgjithshëm i Policisë së Shtetit, Drejtues Madhor Ilir Proda, Ambasadori i Republikës Federale të Gjermanisë, Sh.T.Z. Karlfried Bergner, drejtues të lartë të Policisë dhe përfaqësues të Ambasadës Gjermane në Tiranë.
Gjatë fjalës së tij, drejtori Proda falënderoi ambasadorin dhe BKA-në për mbështetjen e vazhdueshme ndër vite, duke theksuar se pajisjet do të përdoren me përgjegjësi të plotë për përmbushjen me efikasitet të detyrave funksionale të strukturave të specializuara të Policisë.
Nga ana e tij, ambasadori Bergner theksoi rëndësinë e rritjes së bashkëpunimit mes agjencive ligjzbatuese të të dy vendeve në përballjen me sfidat e krimit të organizuar, duke garantuar vijimësinë e mbështetjes gjermane për Policinë shqiptare, përfshirë në fushën teknologjike dhe logjistike.
Ky është një tjetër hap i rëndësishëm në forcimin e kapaciteteve të Policisë së Shtetit, në kuadër të partneritetit strategjik mes Shqipërisë dhe Gjermanisë për sigurinë dhe sundimin e ligjit.
