Kur shqipja standarde përballet me të tilla shtrembërime, ajo rrezikohet së shumti. Rreziku mund të cilësohet dhe më i madh duke marrë në konsideratë që ajo shtrembërohet dhunshëm në njoftimet zyrtare, pikërisht aty ku më së pari standardizimi nuk duhet të vihet në diskutim.
Të “hash” ë-të, t’i shtosh aty ku nuk duhet dhe të tjera gabime të rënda ortografike, gjallojnë dukshëm në një njoftim zyrtar dërguar për mediet së fundmi nga Bashkia e Pukës.
Lehtësisht vihet re ngrënia e zanoreve, mungesa e shenjave të pikësimit dhe shtrembërimi që disa fjalë kanë pësuar.
Shqipja standarde është një gjuhë për përdorim zyrtar dhe publik. Krijimi i një gjuhe standarde nuk ka qenë asnjëherë një akt i menjëhershëm dhe gjatë viteve të fundit shtrembërimet janë shtuar, duke cenuar ndjeshëm gjuhën tonë.
Nevojitet që Shteti dhe institucionet zyrtare publike të zbatojnë me rreptësi rregullat e drejtshkrimit. Të folurit dhe të shkruarit në gjuhën letrare kombëtare është shenjë e një populli që e do dhe e mbron gjuhën e tij.
E kundërta ndodh kur Gjuha Shqipe shkatërrohet me të tilla deformime, ku subjekte drejtuese në vend nuk e vrasin mendjen dhe shkelin rregullat e drejtshkrimit. (XH.A/SHUPLAKA)
Discussion about this post