Ambasadori maltez Pulis shpreh shqetësimin në emër të Bashkimit Europian, për bojkotin e opozitës në Parlament. Sipas Pulis, negociatat do të hapen vetëm nëse do të ketë progress në Reformën në Drejtësi, por kjo nuk mund të arrihet nëse parlamenti vazhdon të bojkotohet apo nëse zgjedhjet do shfaqin probleme.
Në një intevistë për “Top Channel”, Pulis shprehet se si Vettingu dhe si zgjedhjet janë paralelisht kusht për hapjen e negociatave me BE-në.
INTERVISTA:
Kur mund të hapen negociatat me Shqipërinë?
Godwin C. Pulis: Nëse Shqipëria përmbush kushtet e vëna, pra nëse reforma në drejtësi vijon dhe zgjedhjet mbahen normalisht, negociatat do të hapen këtë vit. Zhvillimet e fundit na kanë shqetësuar, sepse zhvillimi i dialogut në Parlament është me rëndësi, në mënyrë që nga tani deri në ditën e zgjedhjeve Parlamenti të zhvillojë punimet pa probleme dhe zgjedhjet të mbahen normalisht.
Është ky një mesazh për opozitën?
Godwin C. Pulis: Unë kam mesazh për qytetarët shqiptarë të përfaqësuar nga mazhoranca dhe opozita, që ata duhet të ulen në Parlament, të diskutojnë, madje në një dhomë me dyer të mbyllura dhe të mos hapen deri kur ata të shtrëngojnë duart dhe të jetë arritur zgjidhja.
Cili është kushti kryesor, zgjedhjet apo vettingu?
Godwin C. Pulis: Për Bashkimin Evropian vettingu është aktualisht përcaktuar si një nga kriteret paralelisht me zgjedhjet. Unë kam besim se qytetarët shqiptarë, të përfaqësuar në Parlament, pra pozita dhe opozita së bashku mund të gjejnë zgjidhje për këto çështje.
Nëse ky konsensus nuk do të arrihet deri në qershor, çfarë do të ndodhë me hapjen e negociatave për Shqipërinë?
Godwin C. Pulis: Një situatë e tillë do të krijonte më tepër vështirësi, prandaj unë këmbëngul që nga tani deri në qershor një zgjidhje duhet gjetur. Pra, nëse edhe zgjedhjet zhvillohen pa probleme, nëse rezultati do të ishte i ndershëm dhe i pakontestuar, ne mund të nisim negociatat pas kësaj. (D.D/Shuplaka)
Discussion about this post