Ditën e mërkurë u shtrua një darkë festive në Pallatin e Brigadave, në të cilën ishin të pranishëm deputetë dhe ministra të maxhorancës. Të pranishëm në takim kanë qenë edhe krerët e koalicionit qeverisës, kryeministri Rama, Ilir Meta, Shpëtim Idrizi, ku nuk kanë munguar as shkëmbimet e batutave mes tyre. Kryeministri në batuta e sipër i ka kujtuar Idrizit se i duhet kohë për yu kolauduar në koalicion.
Sipas asaj që raporton ‘’Panorama’’ ka qenë kreu i Kuvendit ai që ka mbajtur fjalën hapëse të takimit duke vlerësuar punën e maxhorancës.
Kreu i PDIU-së,Idrizi, ka uruar të gjithë katolikët për Krishtlindjet, por dhe të tjerët. Nuk ka munguar batuta e Ramës, i cili i ka kujtuar Vangjel Dulen. “Shpëtim, nuk janë të gjithë katolikë në Shqipëri, ka dhe ortodoksë. Por ti i sheh të gjithë ortodoksët si Vangjel Dulja, dhe nuk i përmend”, ka ndërhyrë Rama.
Më tej, Idrizi e ka vlerësuar si të suksesshëm koalicionin qeverisës. “Jam krenar që jam pjesë e këtij koalicioni të suksesshëm qeverisës, edhe pse jemi më të vegjlit e tij. Bëmë një zgjedhje të vonuar, por të drejtë. Përshëndes Kryeministrin Rama për qasjen që ka ndaj çështjes çame. Listat e kërkesave i kam në xhep me vete, por nuk është ky vendi dhe momenti për t’i trajtuar ato. Shpresoj shumë që koalicioni ynë të vijojë dhe për një mandat tjetër”, është shprehur Idrizi në urimin e tij.
Por edhe në këtë moment nuk ka munguar përgjigjja e Ramës. “Unë dhe Iliri jemi bashkëkryetarë të këtij koalicioni. Si të ardhur vonë në këtë koalicion, juve Shpëtim u duhet pak më shumë kohë për t’u kolauduar”, është shprehur Rama, i cili nuk ka mbajtur ndonjë fjalë përveç urimeve të rastit. Nuk dihet nëse kjo batutë e kryeministrit është rastësore apo kryeministri ka dashur ti fërkojë shpatullat kryetarit të Parlamentit. (E.K/SHUPLAKA)
Discussion about this post