Një raport i kryer së fundmi nga Banka Botërore nxjerr në pah “analfabetizimin” në Shqipëri, që vjen si pasojë e mungesës së informacionit mbi avancimin e teknologjisë dhe zotërimin e kësaj të fundit. Raporti i posaçëm “Zhvillimi Botëror 2016” vë në dukje se vende të tilla si Shqipëria hasin vështirësi përballë nevojave të reja që paraqet tregu i punës.
“Nga Libani, Peruja dhe Vietnami, punëdhënësit janë në kërkim të stafeve që të punojnë në ekipe, të mund të zgjidhin probleme, të mendojnë në mënyrë kritike. Megjithatë, në shumë vende, sistemet arsimore dështojnë për të siguruar edhe njohuritë bazë, si të lexuarit dhe numëruarit. Më shumë se gjysma e 15-vjeçarëve janë funksionalisht analfabetë në vendet me të ardhura mesatare të tilla si Shqipëria, Indonezia, Jordani, Kazakistan, Malajzia, dhe Peru”, konstaton Banka Botërore, shkruan “Monitor”.
Sipas institucionit financiar ndërkombëtar, shkak për këtë është dështimi i sistemit të sotëm të arsimit dhe trajnimit.
Përdorimi i dixhital i teknologjive kërkon aftësi themelore njohëse, të tilla si leximi dhe numërimi, kriter i nevojshëm në tregun e punës. Pavarësisht se shumë punëtorë janë të kualifikuar në disa drejtime, s’mund të integrohen në tregun e punës për shkak se nuk dinë të përdorin kompjuterin dhe internetin.
Portalet e ankesave dhe qendrat e thirrjes për reagime qytetare janë përhapur me shpejtësi në të gjithë vendet në zhvillim, por gjithësi ky reagim i shoqërisë është në një numër shume të kufizuar në Shqipëri dhe Pakistan, citohet në raportin e bankës. (XH.A/SHUPLAKA)
Discussion about this post