BE-ja është e gatshme të mbështesë rivendosjen e ekonomisë siriane, tha Përfaqësuesja e Lartë e BE-së për Punët e Jashtme dhe Politikën e Sigurisë Kaja Kallas gjatë një konference të përbashkët për shtyp me ministrin e Jashtëm turk Hakan Fidan në Ankara.
“Diskutuam një sërë çështjesh në lidhje me bashkëpunimin dypalësh mes Bashkimit Evropian dhe Turqisë. Ne gjithashtu kemi shumë çështje të përbashkëta në politikën tonë të jashtme. Në kuadër të takimit biseduam për situatën në Siri. Edhe pse rënia e regjimit të Asadit jep shpresë, ka edhe kërcënime serioze”, tha Kallas.
Kallas theksoi se populli sirian ka nevojë për një qeveri që përfaqëson plotësisht vendin:
“Ky është gjithashtu qëllimi i BE-së në lidhje me Sirinë. Ne duam të mbështesim rivendosjen e ekonomisë siriane. BE-ja është gjithashtu e gatshme të lehtësojë sanksionet e vendosura ndaj Sirisë bazuar në veprimet e qeverisë së re.”
