Behgjet Pacolli, zëvendëskryeministër i Kosovës dhe njëkohësisht ministër i Jashtëm ka dënuar gjithë provokimet që Serbia i ka bërë Kosovës gjatë Samitit Digjital.
Në një konferencë për mediat Pacolli është shprehur se janë bërë provokime të hapura dhe organizative ndaj Kosovës dhe pavarësisë së saj.
“Gjatë këtij sesioni, organizatorët ndalojnë mikrofonat dhe i kalojnë fjalën dikujt në publik. Aty koncentrohen të gjitha kamerat dhe në monitorët prapa panelistëve fillon të dalë teksti, të cilin po e lexonte ajo grua (nga publiku). Kanë qenë tekste destruktive, shoviniste, ne nuk mund t’i pranojmë ato kurrsesi. Kanë qenë tekste kundër Republikës së Kosovës, kundër pavarësisë së Kosovës, kundër njerëzve të Kosovës. Një gjë e tillë është e papranueshme dhe ne e dënojmë fuqishëm”, tha Pacolli, duke shtuar se situatë identike ka ndodhur edhe në një panel tjetër, në kohën kur Qendra Inovative e Kosovës po paraqiste programin e saj.
Zëvendësministri Pacolli i bëri thirrje Bashkimit Evropian “të disiplinojë Serbinë”, pasi këtë samit e organizon BE.
Ndërkohë që ka vijuar më tej, ai i ka kërkuar ‘ndihmë’ Bashkimit Europian duke e kthyer Serbinë në drejtimin e duhur dhe ta mbaj atë të disiplinuar.
“Ftojmë Bashkimin Evropian që ta disiplinojë Serbinë në të ardhmen, përndryshe Kosova nuk mund të jetë prezente në konferenca të këtij lloji. Prandaj, e ftojmë edhe një herë BE-në që të sqarojë pozicionin e saj ndaj këtyre agresioneve, të cilat i ndodhin Kosovës pothuajse çdo ditë”, tha Pacolli.
Në këtë samit, i icili po zhvillohet në Beograd, po merrë pjesë një delegacion i Kosovës, i kryesuar nga ministri për Zhvillim Ekonomik, Valdrin Lluka, i cili të enjten ka nënshkruar gjithashtu dhe një marrëveshje për heqjen e roaming në disa vende të Ballkanit.
