Sipas një dokumenti të Bashkimit Evropian, i publikuar nga portali BoldNews, Shqipëria nuk ka ende një strategji ose një plan veprimi, për të ulur rreziqet që shkaktohen nga katastrofat natyrore.
“Strategjia kombëtare për zvogëlimin e rreziqeve nga katastrofat dhe të mbrojtjes civile është në pritje të miratimit. Ka progres, deri diku, me ministritë e linjës në ngritjen e zyra të informacionit dhe menaxhimit të emergjencave civile, por nuk ka pasur progres në nivel lokal dhe rajonal”, thuhet në faqen 81 të Progres-Raportit të BE-së për Shqipërinë 2016.
Për më tepër, kapacitetet e institucioneve shtetërore dhe ndërveprimi midis tyre nuk lejon një përgjigje të qenësishme dhe të efektshme në rast emergjencash.
“Kapaciteti institucional dhe bashkëpunimi midis institucioneve të mbikëqyrjes duhet të forcohen për të siguruar veprim të efektshme ndaj situatave të emergjencës”, thuhet në Progres-Raportin e BE-së për Shqipërinë 2016.
Por pse ndodh që kapacitetet institucionale të jenë kaq të dobëta për të përballuar situatat e emergjencave?
Sipas BE-së, fondet e caktuara për emergjencat civile janë ato lloj fondesh që lidhen me rastet më të shumta të korrupsionit.
“Keqmenaxhimi i fondeve publik lidhet kryesisht me emergjencat civile, pagesën e detyrimeve të prapambetura dhe kontrata punësh publike, furnizime e shërbime”,nënvizohet në faqen 86 të Progres-Raportit në fjalë.
Detajet e progres-raportit vijnë në një kohë kur Shqipëria pritet të përballet për disa ditë me një të ftohtë siberian, që sipas Emergjencave Civile, pritet të sjellë në tre ditët e ardhshme temperatura deri në -20 gradë celcius. (A.R/SHUPLAKA)
[ngg_images source=”galleries” container_ids=”587″ exclusions=”158,159,160,163,164,165,166″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
