Teksa 5 ditë e ndajnë Kosovën nga zhvillimi i zgjedhjeve të parakohshme pas mocionit që rrëzoi qeverinë, zyra e Bashkimit Europian në Kosovë, Përfaqësuesja e Posaçme e Bashkimit Europian, EULEX-it, kanë mirëpritur deklaratën e lëshuar nga Shefi i Misionit të Bashkimit Europian për Vëzhgimin e Zgjedhjeve, Alojz Peterle.
Veç kësaj, ata kanë shprehur shqetësimin për incidentet e raportuara të kërcënimit dhe presionit, si ato të dëshmuara gjatë këtyre ditëve në veri të Kosovës dhe pjesë të tjera të saj.
““Ne përsërisim nevojën që të gjithë aktorët politikë të përmbahen nga praktikat që janë në kundërshtim me parimet demokratike dhe në mënyrë të përpiktë ta respektojnë ligjin. Për ne, e drejta e Kosovës për të zgjedhur udhëheqësit e saj, pa frikë apo ndërhyrje, është një parim i shenjtë. Çdo gjë më pak se kjo nuk paraqet demokracinë që njerëzit në Kosovë e presin dhe e meritojnë”, citohet në njoftimin për mediat të zyrës së BE-së.
(XH.A/SHUPLAKA)
