Zyra e Bashkimit Evropian në Shqipëri është ndalur tek gazetaria investigative për të cilën ndau sot tre çmime. Përfaqësuesi i BE-së në Tiranë, John Rudolph, vlerësoi vizibiletin e medias cilësore dhe inkurajoi gazetarët e rinj të zbardhin të vërtetat dhe t’i japin peshë fjalës së lirë.
Gjatë vitit 2016 ishin të shpeshta rastet kur pas raportimeve në media zyrtarë shtetërorë kanë përfunduar në dyert e drejtësisë, apo janë zbuluar skandale me cilësinë e ushqimeve.
Në vlerësim të punës së bërë prej gazetarëve, zyra e Bashkimit Evropian në Shqipëri ka ndarë çmimet për Gazetarinë Investigative për vitin 2016.
Çmimi i Bashkimit Evropian për Gazetarinë Investigative shkoi për “Fiks Fare” dhe gazetaren Alisa Mysliu. Ajo është vlerësuar për kronikën mbi sigurinë ushqimore. Çmimi i dytë dhe i tretë shkuan për gazetarët Artan Rama dhe Elvis Nabolli, që u përzgjodhën mes 28 aplikantëve nga një juri me gazetarë të mirënjohur.
Përfaqësuesi i BE-së, Rudolph, tha se çmimet shkojnë në vlerësim të punës së gazetarëve dhe për të përmirësuar vizibilitetin e medias cilësore.
Çmimet në vlerësim të punës investigative të gazetarëve shqiptarë jepen çdo vit nga BE. (M.D/Shuplaka)
Discussion about this post