Në njoftimin e Përfaqësueses së Lartë të BE-së për Politikë të Jashtme dhe Siguri, Federica Mogherini e përshendet rastin e shembjes së murit kontestues në pjesën veriore të Mitrovicës. Sipas saj përkushtimi konstruktiv të cilin e kanë parë gjatë dy takimeve të fundit të dialogut mes Prishtinës dhe Beogradit në Bruksel, sot sollën rezultate të mëdha.
Në njoftim theksohet se çështjet më të rëndësishme që kanë të bëjë me shndërrimin e rrugës “Mbreti Petar”, që nga qendra e qytetit shpie drejt urës së Ibërit, në zonë për këmbësorët dhe rihapja e urës në Mitrovicë me sukses u zgjidhën në Prishtinë dhe se implementimi i asaj që është dakorduar menjëherë filloi.
“Kjo do të kontribuojë për lirinë e lëvizjes, kontaktin e drejtpërdrejt mes njerëzve dhe përfundimisht pajtimin, prej të cilit do të kenë dobi qytetarët e Mitrovicës Jugore dhe Veriore. Liderët në rajon me shembjen e mureve dhe fokusimin në ndërtimin e urave treguan guxim dhe vizion që është në frymën e dialogut të Brukselit për normalizimin e marrëdhënieve mes Beogradit dhe Prishtinës. Hapja e urës së rivitalizuar të Mitrovicës dhe përfundimi i shndërrimit të rrugës ‘Mbreti Petar’ në zonë për këmbësorët në të ardhmen e shpejtë do të jetë një arritje e rëndësishme në implementimin e marrëveshjes të arritur për dialogun”, shkruhet në njoftimin.
Po kështu theksohet se përparimi i normalizimit të marrëdhënieve mes Kosovës dhe Serbisë është më shumë se kurrë me rëndësi të madhe për ruajtjen e paqes dhe stabilitetit ndërmjet të dyja palëve dhe në rajon dhe po ashtu është vendimtar në përparimin e tyre drejt BE-së. (J.V/Shuplaka)
Discussion about this post