BE reagon për situatën në Maqedoni: Ivanov të respektojë rezultatin zgjedhor dhe Kushtetutën!

Bashkimi Evropian reagon për krizën politike në Maqedoni dhe protestën kundër platformës shqiptare e cila tashmë vazhdon prej disa ditësh.

Zëdhënësja e përfaqësues se Lartë të BE-së, Maja Koçijançiç, deklaroi përpara mediave se unioni nuk e merr në konsideratë letrën e presidentit Gjeorgje Ivanov, që Brukseli të hedhë poshtë platformën shqiptare.

“Jemi në dijeni të letrës së presidentit Ivanov. I bëjmë thirrje të gjithë aktorëve politikë, përfshirë presidentit, të respektojë rezultatin zgjedhor, të veprojë në përputhje me Kushtetutën, të respektojë shumicën e qartë parlamentare, të lejojë procesin demokratik të rrjedh. Kështu, i bëjmë thirrje presidentit që ai të rishqyrtojë qëndrimin e tij aktual dhe të mundësojë formimin e qeverisë së re.”, deklaroi Kocijançiç.

Ndërkohë, zëdhënësja tha që platforma shqiptare duhet të jetë në përputhje me kushtetutën dhe shtoi se nuk do bënte spekulime për të.

 “Sikurse kemi theksuar disa herë, nuk do të spekulojmë ose komentojmë mbi ndonjë program qeveritar specifik i cili duhet sigurisht të jetë në përputhje të plotë me kushtetutën e vendit. Por ne presim formim të shpejtë të qeverisë së re e cila duhet të jetë e angazhuar në implementimin e reformave të prapambetura. Do të vazhdojmë të këmbëngulim në zbatimin e të gjitha pikave të Marrëveshjes së Përzhinës dhe Prioriteteve nga Reformat Urgjente. E gjithë kjo është thelbësore, në mënyrë që të rikthejmë vendin në rrugën e BE-së, atë që dëshirojnë dhe meritojnë qytetarët e vendit.”, shtoi Kocijançiç. (D.D/Shuplaka)