Kryetari i bashkisë së Shkodrës, Benet Beci u shpreh sot se një tjetër investim në Njësinë Administrative Guri i Zi, do t’u vijë në ndihmë banorëve të tre fshatrave të kësaj njësie, por sidomos fermerëve që merren me punimin e tokave bujqësore.
Sipas Becit, po kryhen investime të domosdoshme në shërbim të fermerëve në Njësinë Administrative Guri i Zi. “Po rikonstruktohen kanalet vaditëse me gjatësi 4 km që do t’u shërbejnë 3 fshatrave të kësaj njësie për vaditjen e tokave bujqësore”, u shpreh Beci.
Ndërkohë, disa fermerë të kësaj zone, pohojnë se prej më shumë se 30 vitesh kanë qenë në pritje të një investimi të tillë, që i ndihmon për të mos i lënë djerrë tokat e tyre bujqësore.
“Ka qenë një investim i domosdoshëm dhe që ka vite që e kërkojmë. Këtu kanë qenë tre sisteme vaditjeje që nuk kanë funksionar prej 30 vitesh, por për ne si bujq kanalet vaditëse janë të domosdoshme sepse na mbeten tokat bosh. Tani që u kryhen investimet, presim gjëra edhe më të mira”, thanë ata.
Discussion about this post