Zv.kryeministri dhe ministri i Jashtëm i Kosovës, Behgjet Pacolli, shprehet i bindur se Gjykata Speciale për Krime Lufte në Kosovë, nuk do të ngrejë aktakuza ndaj elitës së politikës kosovare, veçanërisht ndaj atyre që janë gjykuar më parë në Hagë. Ai i referohet kryeministrit Ramush Haradinaj.
“Individët që tashmë kanë mbajtur burg në Evropë, e që pastaj janë liruar, janë kthyer, tani bëjnë punën e tyre për vendin”, është shprehur Pacolli për televizionin zviceran SRF.
Megjithatë, ai e pranon se ka edhe shqiptarë që janë fajtorë për krime lufte. “Është e mirë që do ketë akuza kundër atyre që në të vërtetë kanë kryer krime lufte. Ka patur shqiptarë që kanë qenë fajtorë. Ata duhet të dënohen për këtë”, ka thënë ai. (D.D/Shuplaka)
