Shqipëria është përfshirë prej disa ditësh nga i nxehti afrikan. Meteorologu, Hakil Osmani, është shprehur gjatë një lidhjeje live se edhe kjo javë nis me temperatura shumë të larta, ku në rang territori termometri shkon deri në 40 gradë Celsius.
“Kjo e hënë nis me temperatura shumë të larta ku pritet të regjistrohet në rang territori vlera 40 gradë Celsius, por në kryeqytet pritet që të ngjiten temperaturat e ajrit në 37 apo 38 gradë Celsius. Gjatë orëve të mesditës mbetemi nën ndikimin e kthjellimeve. Bregdeti mbetet kryesisht nën ndikimin e kthjellimeve”, tha sinoptikani.
Temperaturat e larta do të vijojnë deri të premten. Meteorologu sqaroi se nga e premtja do të ketë një rënie të ndjeshme të temperaturave me rreth 4 gradë Celsius.
“Duke filluar nga dita e martë dhe në vijim për sa i përket kushteve të motit do të kemi herë pas here vranësira të shpeshta, të cilat do të krijojnë mundësira për reshje të pakta dhe të izoluara shiu. Do të mbeten të izoluara në zonat malore.
Dita e premte sjell zhvillim të vranësirave duke krijuar mundësira për reshje të pakta dhe të izoluara shiu në pothuajse në një pjesë të mirë të territorit shqiptar. Sa i përket temperaturave të ajrit edhe ditën e nesërme mbetemi nën ndikimin e temperaturave të larta, por duke filluar nga dita e mërkurë dhe enjte kemi një rënie të tyre. Një rënie e ndjeshme pritet ditën e premte ku të paktën kemi një rënie me rreth 4 gradë Celsius duke bërë që vlerat t’i afrohen vlerave normale”, u shpreh Osmani.
