Qyteti i Vlorës u trondit ditën e sotme , pasi një 60-vjeçar u vra nga krushku i tij. Autori i krimit dhe viktima ishin krushq mes tyre , ndërkohë i dyshuari me iniciale J.L, është shpallur në kërkim.
Mësohet se ata të dy banonin në shtëpi ngjitur me njëra tjetrën në Vlorë dhe kanë pasur më herët konflikte e debate pronësie për toka në fshatin Gorisht.
Sakaq bëhet e ditur se shkak i sherrit që ka përfunduar me vrasje, është bërë fakti që familja e njërit prej tyre, donte të vendoste një kamera e cila për shkak të afërsisë së banesave, do filmonte edhe në shtëpinë e tjetrit.
Kjo ka bërë që debati të degradojë me përdorimin e sendeve të forta, e dëmtimet e shumta i kanë marrë jetën 60-vjeçarit.
Policia e Vlorës në një informacion paraprak sqaronte sot: “Rreth orës 10:04, pranë një karburanti në lagjen “11 Janari” Vlorë, dyshohet se pas një konflikti për motive pronësie midis 2 shtetasve (fqinjë) ka mbetur i dëmtuar rëndë shtetasi B.M., 60 vjeç, i cili ka ndërruar jetë në Spitalin Rajonal të Vlorës. Policia ka identifikuar autorin dhe po punohet intensivisht për kapjen dhe arrestimin e tij”.
Discussion about this post