“Nuk është çështje moshe, është çështje energjish. Trupi mund të plaket, por shpirti rinohet”. Kështu do të shprehej Monica Bellucci para pak kohësh në një intervistë ekskluzive për ‘’Vanity Fair Italia”. Aktorja e mirënjohur, e cila ka luajtur në një sërë filmash ku ndër më kryesorët përmendim atë të vitit 2000 ‘’Malena” me regji te Giuseppe Tornatores, jo vetëm që nuk ka ndërmend të plaket, por sivjet do të shënojë datëlindjen e saj të 55-të më e lumtur se kurrë.
Pas divorcit me aktorin e njohur Vincent Cassel, ajo po shijon një lidhje të re me skenografin dhe piktorin e njohur francez, 36-vjeçarin Nicolas Lefebvre. I është besuar një rol shumë i rëndësishëm në kinematografi, si dhe po gëzon suksesin e parë të së bijës si modele.
Deva Cassel është një emër i ri në botën e spektaklit, por premton shumë pasi 14-vjeçarja , është përzgjedhur si imazh nga shtëpia e njohur e modës ‘Dolce & Gabbana’ për fushatën e prezantimit të parfumit të ri, realizuar në qytezën e Salernos.
Me flokët e gjatë e të zinj dhe buzët e plota ajo është një kopje e mamasë së saj, një prej grave më të bukura në botë. Ende nuk e dimë nëse bukuroshja italo-franceze dëshiron të ndjekë gjurmët e prindërve të famshëm ose nëse kjo është vetëm një aventure e këndshme, por mund të konsiderohet pa frikë një ikonë bukurie e kohëve moderne.
