Partia LIBRA nën drejtimin e Ben Blushit çel këtë të dielë fushatën e saj elektorale. Në njoftimin e shpërndarë pak minuta më parë, kjo parti bën të ditur se çelja e fushatës do të bëhet në Amfiteatrin e Akademisë së Arteve në orën 17:30 të së dielës.
LIBRA fton të marrin pjesë të gjithë anëtarët dhe simpatizantët për një Shqipëri më të mirë, më të drejtë dhe më të barabartë.
“LIBRA çel fushaten per zgjedhjet e 25 Qershorit, diten e Diel, ora 17:30 tek Anfiteatri i Akademise se Arteve.
Ne kete aktivitet jane te ftuar te gjithe anetaret e LIBRA, te gjithe simpatizantet e nje Shqiperie me te MIRE, te nje Shqiperie me te DREJTE, te nje Shqiperie me te DITUR, te nje Shqiperie me te BARABARTE.
Mos mungo ne kete event historik, kunder te gjithe klases se vjeter te politikes. LIBRA do te prezantojne Kandidatet e saj dhe zgjidhet per vendin.”, citohet në njoftimin e LIBRA-s.
Sa i përket programit të kësaj partie, në një intervistë të dhënë një ditë më parë për “Shuplaka”, Ben Blushi bëri të ditur se LIBRA synon t’i thotë “Ndal korrupsionit, emigracionit masiv dhe të hapë vende të reja pune për të rinjtë”:
“Jemi partia më e varfër në Shqipëri, çka na bën shumë krenarë dhe duam t’i bindim të gjithë që vota për LIBRËN është e vetmja votë kundër qeverisë Berisha-Rama dhe e vetmja votë që mund t’i thotë ndal korrupsionit, emigracionit masiv dhe të hapë vende pune për të rinjtë. Këto janë qëllimet tona themelore, kjo është arsyeja pse LIBRA është krijuar si një listë e barabartë njerëzish që duan që Shqipëria të dominohet nga barazia, nga dinjiteti dhe nga dija.”
(XH.A/SHUPLAKA)
