Kreu i LIBRA-s Ben Blushi, në një takim me gazetarët, ndryshe nga çdo herë tjetër ka pranuar meritat e Çadrës së Opozitës të mbledhur që prej 18 shkurtit, të cilën deri më tani vetëm e ka kritikuar.
Por sot, në transmetimin e drejtpërdrejt nga Facebook-u i tij, përveç kritikave është shprehur se çadra e opozitës ka si meritë që ka thyer traditën e aleancave të partive politike. Këtë Blushi e tha, pasi gazetarët e pyetën nëse do bënte koalicion me ndonjë nga partitë politike.
“Ne e kemi ditur që në fillim që nuk do të hymë në koalicion. Sepse me kë të bëhemi në koalicion, me PD-në apo me PS-në që mbrojnë parime të ndryshme nga ne. Koalicionet janë e keqja na kanë sjellë në këtë pikë.
Një nga rezultatet më të mira, pozitive që Çadra e PD-së na solli dhe do ta them sot, është që theu traditën e aleancave, duhet t’ja njohim këtë meritë, në kuptimin juridik të zgjedhjeve. Besoj se kurdoqoftë që sistemi të ndryshojë, do shkojmë drejt një sistemi që sulmon aleancat.”, tha Blushi. (D.D/Shuplaka)
