Kisha Katolike në Shkodër ka reaguar në lidhje me atmosferën festive të munguar në qytet për festat e fundvitit, ku bashkia nuk ka vendosur asnjë pankartë ku t’u urohet qytetarëve ‘Gëzuar Krishtlindjen dhe Vitin e Ri 2025’.
Në një reagim publik në Facebook, Famullitari i Kishës Katolike të Shkodrës, Dom Vlash Palaj, i ka bërë thirrje kryebashkiakut Benet Beci, t’i shërbejë komunitetit pjesë e të cilit është edhe ai katolik dhe të vendosë sa më parë në vendet e duhura publike, pankartat me urimin ‘Gëzuar Krishtlindjen dhe Vitin e Ri 2025!’
Postimi i plotë:
Bashkisë Shkodër.
Pse me e fshehë, kur dikush âsht në festë e ndjen fort dëshirën me marrë sa mâ shumë urime.
Me urue mendojmë se don me thanë me shprehë afrimitet, mbështetje, pozitivitet, mirëkuptim dhe harmoni.
E mirëpresim, që në një vend të dukshëm të qytetit të lexojshim një urim, fatkeqësisht të munguem deri më tâsh.
Komunitetet fetare në qytet janë shumë të çmueshme. Jena në prag të Krishtlindjes, në prag të asaj feste që katolikët shqiptarë me shumë sakrifica e kanë festue edhe gjatë diktaturës, bile mund t’a kenë pague edhe shtrejtë, prandaj presim që Bashkia Shkodër, e cila nuk duhet me u identifiku me një person, apo edhe me disa, por si një ent i zgjedhun i pushtetit lokal, me i SHËRBYE komunitetit pjesë e të cilit âsht edhe ai katolik, të vendosë sa më parë në vendet e duhuna publike, pankartat me urimin:
Gëzuar Krishtlindjen dhe Vitin e Ri 2025!
Mirënjohja ka mbarësinë!
Mosmirënjohja ndahet më turp!
Discussion about this post