Ministri i Shëndetësisë Ilir Beqaj, njofton se ka investuar 500 milion lekë për të bërë të mundur krijimin e një salle moderne reanimacioni për spitalin rajonal të Shkodrës.
“Në fillim të vitit të ardhshëm, Spitali Rajonal i Shkodrës do të ketë gati një sallë tërësisht moderne të shërbimit të Reanimacionit. 500 milionë lekë është investimi që ka nisur tashmë, duke përfshirë rikonstruksionin e mjediseve të këtij shërbimi, si dhe furnizimin me pajisjet mjekësore, i cili do të jetë tërësisht funksional dhe në dispozicion të pacientëve të Shkodrës brenda muajit Mars të vitit që vjen.”, shkruan Beqaj.
Sipas ministrit, falë këtij investimi për të fuqizuar shërbimin e Reanimacionit të Përgjithshëm, spitali rajonal i Shkodrës do mund t’i përgjigjet më mirë fluksit të pacientëve që do t’i vijnë nga Kirurgjia e Përgjithshme, Ortopedia, por edhe rastet e ndryshme të traumave.
Ndër të tjera Beqaj shton se kjo qendër spitalore, po shndërrohet në një model të ri të shërbimit mjekësor, modern e bashkëkohor, falë investimeve të shumta të bëra në dy vitet e fundit.
Sipas ministrit, 5 milionë dollarë janë investimet e realizuara deri tani, të marra kryesisht nga buxheti i shtetit, me financime të huaja por dhe nga partneriteti publik-privat.
