Beqaj për akuzat e Vokshit: Na e bëni të lehtë garën politike, s’ia keni idenë Shqipërisë

Ministri i Shëndetësisë, Ilir Beqaj, i është përgjigjur akuzave të deputetes demokrate Albana Vokshi për situatën gripale në Shëndetësi, shiringat e skaduara dhe përpjekjet e ministrisë për të mbuluar dështimin.

Në replikën me të, ministri Beqaj u shpreh se në këtë mënyrë, me këto akuza dhe mungesë informacioni, PD e bën më të lehtë debatin dhe garën politike për mazhorancën. Ai u shpreh se qytetarët shqiptarë janë në gjendje të bëjnë dallimin dhe të zgjedhin.

“Kujdesi shëndetësor nuk është modë. Shqiptarët do të zgjedhin kë model duan, atë që po bëjnë, ata që janë angazhuar, apo alternativën. Ajo që u miratua si financim në Buxhetin 2017 u bë e mundur në KM. Ata që nuk janë të mbrojtur do të marrin rimbursim falas, sic e kemi dhënë mjekun e familjes dhe kontrollin falas.

Nëse ju jeni kundër saj, është zgjedhja juaj. Na e bëni të lehtë debatin dhe garën politike. Na e bëni më të qartë se edhe katër muaj para zgjedhjeve, nuk e keni as fotografinë e Shqipërisë së sotme. Janë rreth 630 mijë vetë të siguruar drejtpërdrejtë e grupe të tjera që sigurohen indirekt. Pra në total 2.3 milionë.

600 mijë nuk janë gjithë të sëmurë, ata kanë pamundësi që në rast sëmundje të mjekohen. Po e rrisim popullsinë që merr mjekim falas. Këta 600 mijë janë në moshë pune, profili i tyre nuk është i pensionistëve dhe fëmijëve. Ky shpjegim nuk është për opozitën, por për t’iu sqaruar juve. 10 mld lekë për rimburisimin e barnave.”, u shpreh Beqaj.

Duke u ndalur në akuzat për gripin, ministri i Shëndetësisë shpjegoi se masa për mbylljen e shkollave u bë për të parandaluar përhapjen e gripit. Sa për vaksinat dhe akuzat e PD-së, Beqaj tha se ato ishin dhuratë nga një donacion botëror.

“Sa për gripin, këtë vit erdhi katër deri në gjashtë javë më shpejt. Ne patëm në fokus fëmijët. Sa për vaksinat, kanë ardhur falas nga një donacion botëror. Janë dhënë nga infermierët në qendrat shëndetësore.

Sa për beratin, nuk përdoret ambulance mjekësore për të transportuar kufomat. Në situata gripale bie imuniteti dhe ata që kanë sëmundje kronike, kanë imunitet më të dobët.

Ka të dhëna zyrtare që provojnë se shpenzimet e shqiptarëve për shëndetësinë janë ulur ndjeshëm. 50 milionë euro më pak në 2015 nga 2014. Unë iu falenderoj përzemërisht me pikëpamjen tuaj që për shëndetësinë shqiptare duhet të paguhet.”, vijoi më tej ai. (XH.A/SHUPLAKA)