Ish-kryeministri dhe kreu i Partisë Demokratike, Sali Berisha, ka bërë sot një tjetër denoncim të rëndë në lidhje me aferën e inceneratorëve, duke akuzuar drejtues të lartë të qeverisë për përvetësim fondesh publike dhe pastrim parash përmes ndërtimit të kullave në kryeqytet.
Berisha u shpreh se 190 milionë euro të shpërdoruara nga inceneratori i Tiranës janë përdorur nga Edi Rama dhe Erion Veliaj për investime private në kulla, ndërsa kreu i SPAK, Altin Dumani, sipas tij, vazhdon të mbajë qëndrim të heshtur ndaj këtyre dëshmive tronditëse.
“Sot qytetarët dixhitalë kanë informuar se janë dhënë dëshmi për investime me paratë e inceneratorit në kulla që lidhen drejtpërdrejt me Ramën dhe Veliajn. Bëhet fjalë për rreth 130 milionë euro të dokumentuara, por në total shuma shkon në 190 milionë euro, duke përfshirë edhe fondet për dhera dhe ndërtime fiktive,” – tha Berisha.
Ai akuzoi SPAK-un dhe prokurorin e posaçëm Altin Dumani për heshtje të qëllimshme dhe për mbrojtje politike të zyrtarëve të lartë të mazhorancës.
“Unë paralajmëroj se çdo përpjekje për të fshehur apo injoruar këto dëshmi, do t’i bëjë ata përgjegjës në të njëjtin nivel me ata që kanë vjedhur. Heshtja për 130 apo 190 milionë euro nuk është as neglizhencë, por bashkëpunim në krim,” – deklaroi kreu i opozitës.
Berisha gjithashtu denoncoi sërish emërimin e Perlat Çullhajt në sektorin shkencor të Ministrisë së Brendshme, të cilin e quajti “një trafikant të provuar dhe milioner të paligjshëm”. Sipas tij, në arkivën dixhitale të Partisë Demokratike ndodhen 34 denoncime të detajuara për aktivitetin kriminal të Perlat Çullhajt, që nga bashkëpunimi me trafikantët, manipulimi i provave, deri tek përfshirja në skema të mëdha të drogës dhe pastrimit të parave.
“Ky është narko-komisari që Edi Rama i beson analizat shkencore në laboratorë shtetërorë. Në vend të luftës ndaj krimit, kemi zëvendësimin e një trafikanti me një tjetër edhe më të rrezikshëm ,nga Niko Brahimi te Perlat Çullhaj,” – u shpreh Berisha.
Në përfundim, ai theksoi se asgjë nuk mund të fshihet përjetësisht, dhe se Partia Demokratike do të ndjekë deri në fund çdo qindarkë të vjedhur nga fondet publike për inceneratorin e Tiranës.
