Ish-kryeministri Sali Berisha ka reaguar lidhur me situatën mjedisore në Elbasan dhe Vlorë, duke e cilësuar atë si “krim të rëndë të amnistuar nga drejtësia”.
Sipas tij, për 6 ditë me radhë qytetarët e Elbasanit janë përballur me ndotjen më të rëndë toksike në historinë e qytetit, ndërsa në Vlorë, djegia e fushave të mbetjeve është kthyer në një cikël të përsëritur çdo 3 muaj.
Berisha akuzon kreun e SPAK, Altin Troplinin, se ka vendosur institucionin në funksion të “partisë së krimit”, duke injoruar krimet e rënda mjedisore të cilat, sipas tij, janë të dënueshme me ligj.
“Të digjen fusha e plehrave në Vlorë çdo 3 muaj, të marrin vlonjatët deri dhe dioksinë… efekte kancerogjene të qarta nga këto djegie. Të gjitha këto nuk ekzistojnë për Troplinin, sepse është peng i Edi Ramës dhe Ulsi Manjës”, thuhet ndër të tjera në deklaratën e tij.
Berisha i bën thirrje qytetarëve dhe mediave që të mos heshtin përballë kësaj që ai e quan “masakër mjedisore të mbrojtur nga heshtja e drejtësisë”.
