Kreu i Partisë Demokratike, Sali Berisha, ka deklaruar se do të punojë për të krijuar zona të lira kufitare në bashkëpunim me qeverinë e Kosovës, si pjesë e një plani më të gjerë për zhvillimin ekonomik të zonave verilindore të Shqipërisë.
Ai theksoi se ky plan do të përfshijë shfrytëzimin racional të burimeve dhe potencialeve të këtyre zonave, duke siguruar që banorët do të përfitojnë drejtpërdrejt nga ky zhvillim.
Gjithashtu, Berisha ka premtuar mbështetje për investimet në këto zona, duke ofruar lehtësime taksash dhe subvencione. Ai ka kritikuar qeverinë aktuale për anulimin e ligjit të vitit 2013 që parashikonte 8 vite pa taksa për investimet në zonat malore, duke e quajtur këtë veprim të padrejtë dhe në shërbim të interesave të caktuara.
Pjesë nga fjala e kreut të PD Sali Berisha:
Së pari, për zonat verilindore do ketë plan ekonomik për shfrytëzimin racional të të gjitha potencialeve dhe burimeve të tyre, ku duhet të përfitojnë banorët e këtyre zonave.
Së dyti, do bëjmë gjithçka që me qeverinë e Kosovës të krijojmë zona të lira kufitare.Së treti, do bëjmë gjithçka që të subvencionojmë, të mbështesim investimet me lehtësime taksash.
Unë u them ju, se ligji i vitit 2013 parashikonte 8 vite pa taksa për investimet në zonat malore dhe atë ligj e anuloi Edi Rama dhe tani e riktheu me Paketën e Maleve për t’u dhënë trafikantëve të tij atë që nuk e meritojnë.
