Ish-kryeministri Sali Berisha ka reaguar me tone të ashpra ndaj kryeministrit Edi Rama dhe mediave që, sipas tij, përpiqen të relativizojnë zhvillimet e fundit politike dhe kritikat ndërkombëtare ndaj qeverisë. Në një deklaratë për shtyp, Berisha tha se televizioni amerikan Fox News ka “damkosur” Ramën, duke e krahasuar me liderin autoritar venezuelian Nicolás Maduro.
“Fox News e kllaposi Edi Ramën si ‘Ramaduro i Europës’. Ky është një zhvillim jashtëzakonisht i rëndësishëm pas denoncimeve të karteleve të drogës nga Departamenti Amerikan i Drejtësisë,” – tha Berisha.
Ai e përshkroi Edi Ramën si “armikun më të egër të fjalës së lirë dhe votës së lirë”, duke theksuar se opozita nuk do të ndalet deri në rikthimin e votës së lirë për qytetarët shqiptarë.
“Nuk ka armik më të egër për njeriun se ai që i mohon të drejtën për të votuar dhe për të folur. Beteja jonë do të vazhdojë deri në fund,” – përfundoi ai.
