Ish-kryeministri Sali Berisha ka akuzuar sërish drejtuesin e Prokurorisë së Posaçme, Altin Dumani, dhe prokurorin Altin Troplini, për mbrojtjen e grupit kriminal të njohur si “karteli Çela”.
Në një deklaratë për mediat, Berisha tha se ndërhyrjet e fundit ndaj këtij karteli nuk janë rezultat i veprimeve të SPAK, por të urdhëruara nga prokuroria e Veronës në Itali.
“Ishte një falsitet i plotë që SPAK kishte ndërhyrë ndaj kartelit Çela. Ishte prokuroria e Veronës ajo që urdhëroi sekuestrimin e pasurive,” – deklaroi Berisha.
Ai shtoi se në dosjet e Prokurorisë së Posaçme ndodhen “kilometra biseda” mes ministrit të Brendshëm, Taulant Balla, dhe Mario Çelës – vëllai i Suel Çelës – në të cilat, sipas tij, flitet për zgjedhje, kundërshtarë politikë dhe projekte.
“Të gjitha këto i mbyll Altin Troplini, pengu i krimit,” – theksoi Berisha.
Ish-kryeministri nënvizoi se të gjitha arrestimet dhe sekuestrimet e mëdha ndaj grupeve kriminale në vend janë bërë me iniciativën e partnerëve ndërkombëtarë, dhe jo të SPAK-ut.
“Asnjë trafikant, asnjë organizatë kriminale nuk është arrestuar me iniciativë të SPAK-ut, por vetëm pas kërkesave të partnerëve italianë, gjermanë, amerikanë dhe të tjerë,” – përfundoi ai.
Deklaratat e Berishës vijnë në një kohë kur SPAK dhe institucionet e drejtësisë janë nën vëmendje të lartë publike dhe ndërkombëtare për luftën kundër krimit të organizuar dhe korrupsionit.
