Gjatë ceremonisë për përurimin e shtatores së heroit të demokracisë Josif Budo në Kavajë, lideri historik i Partisë Demokratike, Sali Berisha, ka vlerësuar me nota të larta rolin dhe kontributin e ish-ambasadorit gjerman në Shqipëri, Werner Daum, në ngjarjet historike që çuan drejt përmbysjes së regjimit komunist.
Berisha e cilësoi ambasadorin Daum si një “mik të përjetshëm të lirisë së shqiptarëve”, duke theksuar se në një kohë të errët për vendin, ai zgjodhi të qëndrojë në krah të qytetarëve që kërkonin liri, duke transformuar ambasadën gjermane në një simbol të shpresës dhe kurajos.
“Ambasadori Daum ishte një kavalier i vetmuar që qëndroi në anën e të rinjve idealistë dhe qytetarëve liridashës të Shqipërisë, në një kohë kur shumë të tjerë mendonin se diktatori shqiptar ishte thjesht një ‘Gorbaçov lokal’,” – tha Berisha.
Sipas tij, ambasadori gjerman nuk i besoi narrativave që justifikonin regjimin dhe nuk e pranoi mentalitetin se shqiptarët ishin të destinuar të jetonin nën diktaturë. Në vend të kësaj, ai besoi se shqiptarët meritonin të njëjtën liri si popujt e tjerë të Evropës Lindore dhe veproi në përputhje me këtë bindje.
“Ambasadori Daum qëndroi në anën e Josif Budos, qëndroi në anën e Kavajës dhe të të gjithë atyre që luftuan për dinjitet dhe demokraci. Historia i dha të drejtë,” – përfundoi Berisha.
