Kreu i Partisë Demokratike, Sali Berisha, deklaroi se gjatë vizitës së tij dyditore në Bruksel, në Parlamentin Europian, u bë një akuzë e drejtpërdrejtë ndaj Edi Ramës, manipulimeve zgjedhore dhe lidhjeve të pushtetit me krimin e organizuar.
Në një deklaratë për mediat, Berisha theksoi se vizita në Bruksel ka prodhuar 34% më shumë jehonë mediatike në Shqipëri se sa vetë Samiti i Bashkimit Politik Europian, duke nënvizuar rëndësinë dhe impaktin e saj në opinionin publik.
“Rrallëherë PD-ja ka arritur një apogje të tillë mediatike, çka tregon drejtësinë dhe fuqinë e misionit tonë për mbrojtjen e votës së lirë të shqiptarëve,” – tha Berisha.
Ai u shpreh se qeveritarë të shumtë janë përfshirë në “lakeizëm të neveritshëm” për të mbrojtur Edi Ramën dhe pozicionet e tyre në narkoshtet, ndërkohë që në Bruksel u ekspozua realisht gjendja e demokracisë në Shqipëri.
“Në Bruksel mori plagë të pashërueshme farsa zgjedhore. U demaskuan lidhjet me botën e krimit, kartelet e drogës dhe organizatat kriminale,” – vijoi Berisha.
Sipas tij, dy ditët e vizitës – e marta dhe e mërkura – ishin ditët kur në zemër të Europës u mbrojt vota e lirë dhe u ngrit një “pretencë politike” ndaj shtetit të kapur shqiptar.
Ai akuzoi direkt qeverinë për bashkëpunim me figura të krimit të organizuar si “Pojat, Çelat, Bajrat”, dhe emra të tjerë që i lidh me pushtetin dhe parlamentin, duke i përmendur si simbolikë të dështimit të shtetit të së drejtës në Shqipëri.
“Në ato dy ditë, Brukseli ishte më shumë shqiptar se kurrë më parë. Ishin ditë që i ngecën në fyt Edi Ramës dhe të gjithë atyre që mendojnë se mund ta blejnë votën e shqiptarëve me krim dhe drogë,” – përfundoi ai.
Zyra e Medias dhe Komunikimit – Partia Demokratike
