Kryetari i Partisë Demokratike, Sali Berisha, ka publikuar sot foto dhe video që, sipas tij, faktojnë përfshirjen e patronazhistëve në procesin e manipulimit të votës së diasporës, gjatë zgjedhjeve të 11 majit.
“Pamjet tregojnë qartë se personi që merr në dorë votën e diasporës është një patronazhist i drejtuar drejtpërdrejt nga famëziu Taulant Begajaris. Ja ku janë – krenarë për krimin që kryejnë,” – deklaroi Berisha gjatë një komunikimi për mediat.
Ai theksoi se ky është vetëm një nga episodet që dëshmojnë se votat e diasporës janë shtetëzuar dhe manipuluar, në funksion të asaj që Berisha e cilësoi si “partia e krimit”.
“Ky është vetëm një fakt ndër të shumtit që kemi. Vota është marrë në dorë nga strukturat e partisë në pushtet, në shkelje të plotë të ligjit dhe të kontratës me qytetarët,” – u shpreh ai.
Në përfundim, Berisha theksoi se zgjedhjet e 11 majit nuk mund të njihen dhe se çdo demokrat ka për detyrë themelore të angazhohet për rikthimin e votës së lirë, largimin e Edi Ramës nga pushteti dhe ngritjen e një qeverie teknike që garanton zgjedhje të ndershme.
