Jashtë ambienteve të Parlamentit, ish-kryeministri Sali Berisha pati një prononcim për mediat. Ai u ndal tek raporti i OSBE-s për zgjedhjet 14 majit.
Për Berishën, ky pushtet qëndron dhe bazohet tek vota e vjedhur prandaj është jetike për të rikthimi i votës së lirë.
Gjithashtu ish-kryeministri paralajmëroi protesta duke thënë se po përgatiten për një lëvizje të qëndrueshme që shqiptarët të votojnë të lirë, si popujt e tjerë të rajonit.
Sali Berisha: Ky pushtet qëndron i bazuar në raportin krimi shndërrohet në votë dhe vota në krim. Kurrë të mos përligjet një votë e vjedhur. Vota e vjedhur nuk shpreh vullnetin qytetar, por të rrëmbyesve të votës. PD qëndron e vendosur të udhëheqë shqiptarët drejt një përpjekjeje të madhe që shqiptarët të votojnë si qytetarët e tjerë evropianë.
Në një votë të kontrolluar, të blerë dhe nën terror, siç thotë raporti i OSBE, nuk ka asgjë që mund të provojë humbjen e opozitës. Këto provojnë vjedhjen e votës. Ata që mendojnë se Rama vodhi zgjedhjet dhe i fitoi ato, ata vetëm përligjin vjedhjen dhe kjo është katastrofë.
Ata që janë interesuar për votën e lirë, janë së paku 600 mijë që nuk u ndikuan dhe votuan në misionin e ri. Të ngrihemi ndaj këtij regjimi. Ne po përgatitemi për një lëvizje të qëndrueshme që shqiptarët të votojnë të lirë, si popujt e tjerë të rajonit.
U drejtohemi të gjithë idealistëve, misioni ynë është të rikthejmë të drejtën për të votuar shqiptarëve në një lëvizje të re të fuqishme. PD do lëvizë në shumë plane, por drejtim kryesor duhet të jetë përmbysja e këtij regjimi që qëndron mbi binomin krimi-votë dhe vota-krim.
