Ish-kryeministri Sali Berisha ka reaguar ashpër pas vendimit për zgjatjen me 6 muaj të hetimeve ndaj kreut të Partisë së Lirisë, Ilir Meta. Në një deklaratë për mediat, Berisha e ka cilësuar këtë vendim si një veprim të diktuar politikisht nga kryeministri Edi Rama dhe prokurori Altin Troplini, të cilët sipas tij po shkelin ligjin dhe të drejtat themelore të njeriut.
“Vendimi për të mbajtur në burg Ilir Metën është një akt kriminal dhe politik që dëshmon frikën e Edi Ramës ndaj opozitës,” tha Berisha, duke shtuar se Meta u arrestua pa urdhër arresti dhe mbahet në burg pa prova konkrete.
Berisha akuzon qeverinë se po përdor drejtësinë si mjet për të shtypur kundërshtarët politikë, duke e krahasuar situatën aktuale me regjimet diktatoriale të së kaluarës. Ai përmend edhe të shkuarën familjare të Ramës, duke bërë lidhje me emra të njohur të regjimit komunist, si Spiro Koleka dhe Kristaq Rama.
“Nuk ka kufi urrejtja e Edi Ramës për kundërshtarin politik,” deklaron Berisha, duke shtuar se kryeministri është i udhëhequr vetëm nga “fakultetet më të errëta të qenies njerëzore.”
Në përfundim, Berisha shprehu solidaritet të plotë me Ilir Metën dhe paralajmëroi se Rama dhe Troplini “do të përgjigjen për këtë akt”. Ai i bëri thirrje komunitetit ndërkombëtar të mbajë një qëndrim të qartë ndaj “narkoregjimit të Edi Ramës”, siç e cilësoi ai.
