Kreu i Partisë Demokratike, Sali Berisha, ka bërë akuza të forta gjatë një aktiviteti mbi procesin e integrimit të Shqipërisë në Bashkimin Evropian, duke deklaruar se vendi ka hyrë në negociata pa përmbushur kriteret themelore dhe se ndodhet në një situatë të rëndë politike, ekonomike dhe shoqërore.
Sipas Berishës, Shqipëria nisi negociatat e anëtarësimit me BE-në vetëm për arsye gjeopolitike dhe jo mbi bazën e standardeve. Ai theksoi se në momentin e hapjes së negociatave, pushteti ishte i përqendruar pothuajse tërësisht në një dorë, duke i referuar 94% të institucioneve të kontrolluara nga qeveria aktuale.
“Në vitin 2020 nisën negociatat me një qeveri që kishte përqendruar pothuajse çdo pushtet në duart e saj. Kryeministri është bërë kryetar i këshillave të të gjitha fushave, përfshirë shkencën dhe ujërat, madje edhe çdo ndërtim në vend kërkon nënshkrimin e tij”, deklaroi Berisha.
Ai shtoi se Shqipëria është shndërruar në narko-shtetin e parë dhe të vetëm në Europë, duke e bazuar këtë pretendim në të dhëna mbi ekonominë dhe kursin e euros.
“Ekonomia shqiptare është zëvendësuar nga narko-ekonomia. Euro është zhvlerësuar ndjeshëm për shkak të fluksit të parasë informale. Ndërsa produkti industrial dhe eksportet janë në rënie të vazhdueshme, sektori i ndërtimit ka një rritje të pashpjegueshme, tri herë më të lartë se mesatarja evropiane”, u shpreh lideri demokrat.
Një tjetër shqetësim që ngriti Berisha ishte emigracioni masiv i shqiptarëve gjatë dekadës së fundit. Ai citoi të dhëna të Eurostat sipas të cilave, mbi 1 milion shqiptarë kanë lënë vendin vetëm drejt zonës Shengen që nga viti 2014.
“Shqipëria është kthyer në një vend që prodhon emigrantë dhe refugjatë. Kjo është pasojë direkte e krizës së thellë politike, korrupsionit dhe mungesës së shpresës”, tha ai.
Berisha paralajmëroi se nëse integrimi europian bazohet vetëm në stabilokraci dhe jo në standarde demokratike, kjo i hap rrugën autokracisë dhe rrezikon jo vetëm vendet kandidate, por edhe vetë Bashkimin Evropian.
