Kryetari i Partisë Demokratike, Sali Berisha, ka reaguar lidhur me procesin e zgjedhjeve të 11 majit 2025, duke e cilësuar atë një farsë elektorale të bazuar në manipulim të thellë dhe ndërhyrje kriminale.
“Farsa elektorale e 11 majit 2025 u mbështet nga një industri e mirëfilltë mafioze e manipulimit dhe falsifikimit të votës së qytetarëve, brenda dhe jashtë Shqipërisë,” – u shpreh Berisha.
Sipas tij, presionet mbi votuesit dhe procesin zgjedhor u ushtruan nga grupime kriminale ndër më të mëdhatë në Europë, si kartelet Poja, Troplini, Çela, Bajri, si dhe organizata terroriste “Hakmarrja për Drejtësi”, në bashkëpunim me zyrtarë të qeverisë aktuale.
“Ata shkelën çdo rregullore dhe kontratë ligjore, duke ndërhyrë në një proces kushtetues e historik si ai i votës së diasporës, që u zhvillua për herë të parë në vend,” theksoi Berisha.
Ai nënvizoi gjithashtu se Partia Demokratike ka në dispozicion një sërë të dhënash që do t’i bëjë publike, për të dokumentuar në mënyrë të qartë dhe të pakundërshtueshme farsën zgjedhore.
“Problemi më i madh,” – tha Berisha, “është se mediat kryesore në vend, siç vëren edhe raporti i OSBE-ODIHR, ishin të rreshtuara në krahun e qeverisë dhe të farsës. Prandaj dhe sot, po tentohet me çdo mënyrë të mbulohet e vërteta.”
Ai akuzoi strukturat mediatike dhe aktorë të lidhur me krimin për përpjekje të organizuara për të fshehur realitetin e 11 majit, duke shmangur transparencën dhe të vërtetën nga qytetarët.
