Ish-kryeministri Sali Berisha ka akuzuar kryeministrin Edi Rama për hakmarrje politike ndaj banorëve të Thethit, pas prishjes së disa ndërtesave në këtë zonë turistike. Në një deklaratë të fortë për mediat, Berisha e cilësoi ndërhyrjen si një akt të qëllimshëm ndëshkues, të motivuar nga rezultatet elektorale në zonë.
“Ky është rezultati i qendrës së votimit ku ju patë atë krim të shëmtuar. PD ka marrë 95 vota dhe PS 82. Pra, nuk kanë votuar PS-në, kanë votuar PD-në. Dhe kjo është hakmarrja primitive, kriminale e Edi Ramës ndaj tyre,” – deklaroi Berisha.
Ai u shpreh se përpara zgjedhjeve, qeveria ishte krenuar me zhvillimet turistike në Theth, përfshirë rritjen e kapaciteteve akomoduese në zonë, ku sipas tij ishin ndërtuar rreth 2 mijë shtretër për turistët.
“Vërtet arritje shumë e madhe, po të kemi parasysh se një shtrat në Theth ka një kosto të paktën tre herë më të lartë se në Tiranë apo në bregdet, për shkak të kushteve dhe distancës,” – tha ai.
Berisha akuzoi kryeministrin Rama se, për shkak të disfatës elektorale në këtë zonë, po ndëshkon në mënyrë selektive banorët me prishje ndërtesash, të cilat sipas tij janë të ligjshme dhe ndodhen në zonën urbane të lejuar për ndërtim.
“Ky është Thethi i 2 mijë shtretërve sot, një vend i kthyer në shesh shkatërrimi, vetëm sepse nuk mbështeti Partinë Socialiste. Kjo është fytyra e hakmarrjes primitive dhe çnjerëzore të Edi Ramës,” – u shpreh Berisha.
Në fund të deklaratës së tij, ai bëri thirrje për mobilizim qytetar:
“U bëj thirrje banorëve të Thethit, të Shkodrës dhe të gjithë Shqipërisë të ngrihemi për t’u ndarë një herë e mirë nga kjo e keqe e madhe, që po rrënon çdo ditë jetën e shqiptarëve.”
Deklaratat e Berishës vijnë në një klimë të tensionuar politike, pas ndërhyrjeve të institucioneve shtetërore për prishjen e ndërtimeve të dyshuara si të paligjshme në zonat turistike.
