Banka Europiane për Rindërtim dhe Zhvillim është shprehur së fundmi se pavarësisht se statistikat zyrtare flasin për rënie të pabarazisë, qytetarët perceptojnë të kundërtën.
Dhe sipas BERZH-it, kjo do të thotë shumë sepse ajo çka mendojnë njerëzit ka më tepër rëndësi se sa statistikat zyrtare.
Sipas zyrtares Francesca Dalla Pozza të BERZH, “ky tregues vlen shumë. Perceptimet e publikut janë më të rëndësishme sesa ajo që tregojnë statistikat zyrtare në formimin e besimit të individëve, në formimin e institucioneve ekonomike dhe politike, por mbi të gjitha ato ndikojnë mënyrën sesi votojnë qytetarët”.
Rritja e pabarazisë së perceptuar përbën rrezik jo vetëm për ekonominë, por dhe stabilitetin.
Zhvillimi i pabarabartë mes shtresave të ndryshme përbën një fenomen që tanimë ka prekur të gjitha ekonomitë e ngjashme të rajonit, për shkak se rritja ekonomike ka shkuar tek një grup i vogël popullsie.
Referuar Bankës Botërore, pabarazia u rrit më tepër gjatë krizës që goditi më tepër shtresat më të varfëra.
Sipas ekspertëve të BERZH, lajmi i mirë është se periudha më e vështirë ka kaluar dhe në Shqipëri.
“Raporti i Bankës për Rindërtim dhe Zhvillim evidenton se pabarazia në ekonomi, në mundësi dhe përfshirje financiare është rritur duke ndikuar negativisht mirëqënien ekonomike të vendeve në tranzicion. Gjetja e rrugëve të zgjidhjes është një sfidë e vështirë, ku edukimi financiar dhe përfshirja financiare vlerësohen si mundësi për të adresuar këtë problematikë”, deklaroi kreu i Bankës së Shqipërisë, Gent Sejko. (XH.A/SHUPLAKA)
Discussion about this post