Besimtarët katolikë kremtojnë sot Ditën e Larit, një nga momentet më të rëndësishme të kalendarit liturgjik që shënon hyrjen në Javën e Madhe dhe përgatitjen shpirtërore për Pashkët. Kjo e diel, e njohur ndryshe si “E Diela e Mundimeve të Zotit”, kujton hyrjen triumfale të Jezusit në Jeruzalem, dhe pasohet nga kremtimet më të thella të fesë së krishterë.
Në këtë ditë të veçantë, liturgjia nis jashtë ambienteve të kishës, ku besimtarët mblidhen rreth meshtarit për bekimin e rremave të larit, ullirit apo palmave. Më pas, procesioni simbolik drejt Kishës shënon fillimin e Meshës solemne, e cila përfshin leximin dramatik të Mundimeve të Krishtit. Ky rrëfim interpretohet nga tre persona që përfaqësojnë rolin e Jezusit, narratorit dhe popullit, ndërsa meshtari vesh petkat liturgjike të kuqe – simbol i gjakut dhe martirizimit.
Dita e Larit nuk është vetëm një festë katolike; ajo kremtohet gjithashtu nga besimtarë ortodoksë dhe protestantë në mbarë botën. Rrënjët e saj të thella shpirtërore reflektohen edhe në traditat popullore që e shoqërojnë: degët e bekuara merren në shtëpi si simbole paqeje e bekimi. Në disa zona, kryefamiljari përdor këto degë për të spërkatur shtëpinë me ujë të bekuar gjatë Natës pa gjumë të Pashkëve, si një rit pastrimi e shenjtërimi.
Gjithashtu, në prag të Pashkëve, artizanët krijojnë zbukurime të ndërlikuara me gjethet e palmave, të cilat shkëmbehen si dhurata festive ndërmjet besimtarëve. Degët e vitit të kaluar digjen dhe hiri i tyre përdoret për përhimjen e besimtarëve të Mërkurën e Përhime duke mbyllur kështu një cikël të thellë shpirtëror.
Dita e Larit është jo vetëm hyrje në një javë reflektimi dhe përjetimi të thellë fetar, por edhe një dëshmi e gjallë e traditës dhe besimit të palëkundur të komunitetit të krishterë.
