Aktivisti Besjan Pesha i bashkohet protestës së banorëve në Verri të Fierët, të cilët kërkojnë pezullimin e ndërtimit të impiantit të përpunimit të mbetjeve urbane, e cila do të prodhojë helm për tokat e tyre.
Pesha shprehet se policia i ka kërcënuar disa herë banorët me procedim për protestë të jashtëligjshme, ndërsa ende nuk është bërë asgjë për kompaninë e cila nuk siguron as leje për kryerjen e punimeve.
“Sot isha në Verri të Fierit për të mbështetur banorët të cilët kanë ditë që protestojnë kundër projektit të inceneratorit i cili ju rrezikon shëndetin dhe prodhimin bujqësor.
Është shumë interesante të shohësh se si policia ka kërcënuar disa herë banorët me procedim për protestë të jashtëligjshme dhe nuk bën asgjë kundër kompanisë e cila edhe pse nuk disponon asnjë leje, ka çuar mjetet dhe po kërkon të fillojë punimet. (Meqë ra fjala një pjesë e mjeteve janë edhe me targa fallse).
Falë banorëve asnjë cm punë nuk është bërë dhe nuk do të bëhet në atë zonë. E ardhmja e Myzeqesë, por edhe e gjithë Shqiperisë nuk është dhe nuk do të jetë biznesi mafioz i plehrave, por zhvillimi i prodhimit bujqësor.”, shprehet Pesha.
Në një video të publikuar në profilin e tij në Facebook, Pesha shprehet se si ai dhe banorët nuk kanë besim te politika dhe partitë politike. Ai u kujton banorëve rastin e Zharrëzës si shembull, për t’u treguar se nëse populli është i vendosur asgjë nuk do bëhet.
Sipas Peshës, ky impiant do të prodhojë helm për këtë tokë por edhe për të gjitha familjet shqiptare dhe tryezat e tyre. “Kjo që po bëni është heroike, të jeni të sigurt që do fitoni. Vetëm nëse ju tërhiqeni ky projekt mund të behët sepse nëse jeni të vendosur ky projekt nuk do bëhet!”, u drejtohet Pesha qytetarëve.
Banorët e Verrisë prej një jave tashmë, janë në protestë dhe i bëjnë thirrje firmës të ndërpresë punimet e të largohet. (D.D/Shuplaka)
Discussion about this post