Auron Tare, drejtori i Agjensisë Kombëtare të Bregdetit shprehu në studion e Fax News, kritika të forta ndaj ndërhyrjeve të Ministrisë së Kulturës për ndërtimin e kioskës në parkun arkeologjik të Butrintit, në muajin nëntor të vitit të kaluar.
“Në lidhje me çështjen e Butrintit dhe kioskës që është vënë aty. Fusha e restaurimit është fushë kompetente shumë specifike. Me të merren agjensi të specializuara siç është Ikonosti. Në rastin e Butrintit nuk kemi restaurim por ndërhyrje që dëmton. Ka një plan manaxhimi të bërë që në 2001 që përcakton se ku ndërhyhet. Ajo atje nuk ka lidhje me restaurimin.” – ka kritikuar Tare, ndërtimin e kioskës në Butrint nga Ministria e Kulturës.
Auron Tare tha se është gabim shumë i madh praktika e restaurimit të monumenteve të historisë dhe kulturës me tendera ndërkohë që specialistet e Institutit të Monumenteve nuk i pyet njeri.
“Monumentet nuk restaurohen me tender. Ka një përjashtim – në Francë monumentet restaurohen me tender por janë komapmni super specializuara për restaurim. Në Shqipëri këto janë firma ndërtimi që njohin drejtorin dhe i japin një tender për të restauruar dhe për të fituar.
Sot ish profesorët restauratorë të Institutit të Monumenteve rrinë pinë kafe dhe nuk i pyet njeri.” – është shprehur Tare.
Tare ka folur edhe për ruajtjen e trashëgimisë arkeologjike nënujore në vendin tonë.
Sa i përket zbulimeve nënujore Tare thotë se në Shqipëri kjo nuk ruhet dhe madje është dëmtuar.
“Në Shqipëri faktorët kryesorë të dëmtimit janë shqiptarët për t’i vjedhur sa më shumë dhe për t’I prishur. Siç janë këto amforat që i prishin apo peshkatarët që i godasin nën ujë me anijet e peshkimit.” – tha Tare.
Auron Tare u shpreh se në Shqipëri nuk po marrim dot masa si puna e Anglisë apo Greqisë që i kanë futur në kafaz nënujor duke markuar zonat përkatëse dhe duke ndaluar lundrimin.
“Shqipëria sot nuk ka ende një ligj për zbulimet nënujore, por me zbulimet dhe me zhvillimet e fundit bëhet e nevojshme pasja e një ligji të tillë.” – tha drejtori i Agjensisë Kombëtare të Bregdetit.
Në lidhje me mbrojtjen e këtyre zbulimeve nga UNESCO, Tare sqaroi se në vendin tonë, në UNESCO përfshihen Butrinti, Gjirokastra, Berati si pasuri materiale dhe Polifonia që është pasuri jomateriale.
“Nuk kemi site të tjera që janë me vlerë të trashëgimisë. Shqipëria ka pasuri normale si çdo vend Ballaknik, asgjë të jashtëzakonshme.” – tha Auron Tare.
(E.L./Faxweb)
Discussion about this post