Emira Selimi, shqiptarja nga Shkupi, ka ndërmarrë iniciativën për të hapur bibliotekën e parë shqipe në Manastir, qytetin historik të Alfabetit, biblotekë e cila prej 1 viti e gjysmë është në funksion. Në një intervistë për Fax News, me gazetaren Sedjana Huna, Selimi tregon se ideja lindi nga mungesa e një hapësire ku shqiptarët e atjeshëm mund të lexojnë dhe të kultivojnë gjuhën e tyre.
Megjithëse është përballur me sfida si mungesa e fondeve dhe hapësirës së duhur, ajo ka marrë mbështetje nga shqiptarë të shumtë, por jo institucioneve kulturore shqiptare dhe shqiptare maqedonase.
Biblioteka ofron libra nga autorë shqiptarë në gjuhën shqipe, duke përfshirë letërsi artistike, histori dhe materiale edukative. Ajo e ka kthyer biblotekën jo vetëm në një vend leximi, por edhe në një qendër kulturore ku organizohen aktivitete letrare, mësime të gjuhës shqipe dhe evente të tjera që forcojnë identitetin shqiptar në Manastirin e bukur.
