Euro ka arritur nivele më të ulëta prej vitit 2009, e teksa kjo monedhë vijon të pësojë rënie, ajo ka sjellë përfitime dhe humbje për kategori të ndryshme.
Nga rënia e euros kanë dalë të fituar kryesisht personat dhe bizneset që kanë kredi në euro, ata që duan të blejnë shtëpi apo ata që zgjedhin të udhëtojnë nëpër Europë.
Por niveli i ulët i euros ka sjellë edhe humbje nga kjo situatë për ata që paguhen në euro dhe për eksportuesit. Bazuar në një klasifikim të “Monitor”, renditen disa kategori fituesish dhe humbësish.
Këstet e kredive më të lira në euro, më të shtrenjta në dollarë
Nëse disa vite më parë huatë ishin të preferuara në euro, sot është e vështirë të marrësh një hua në valutë, pasi bankat i rekomandojnë klientët të marrin hua në monedhën që ata i kanë të ardhurat.
Kredimarrësit që kanë të ardhura në lekë po përfitojnë nga zhvlerësimi i euros, që i ka bërë këstet rreth 5% më të lira se dy apo tre vite më parë. Në të kundërt, të gjithë ata që kanë marrë kredi në dollarë u rezultojnë këstet më të shtrenjta.
Çmimet e shtëpive
Teksa çmimet e apartamenteve po njohin rritje të shpejtë muajt e fundit, shtrenjtimi i tyre po amortizohet disi nga nënçmimi i euros.
“Sot, në të njëjtën zonë, për të njëjtën sipërfaqe, kur çmimi ka arritur në 1100 euro për metër katror, apartamenti kushton 99 mijë euro. Nëse kursi do të ishte i njëjtë si në vitin 2014, atëherë kosto e shtëpisë në monedhën vendase do të ishte 13.9 milionë lekë, apo 10% më i shtrenjtë. Por, sot, kur euro këmbehet me rreth 135 lekë, kosto reale e shtëpisë është 13.5 milionë lekë, apo rreth 7% më e shtrenjtë, duke bërë që kursimi nga kursi i këmbimit të jetë gati 3 mijë euro.”, shkruan “Monitor”.
Ulen pagat në euro, rriten ato në dollarë
Shumë institucione, por dhe biznese private i paguajnë në euro punonjësit. Ndërsa ata iu gëzuan një rritjeje të euros në vitet 2010-2015, tashmë po u ndodh e kundërta. Ndonëse paga mund të mos ketë ndryshuar, të ardhurat reale në lekë janë 4-5% më të ulëta se dy vjet më parë, kur euro këmbehej me 140 lekë.
Një pagë vjetore prej 1200 eurosh, e konvertuar me kursin e sotëm është 163 mijë lekë, nga 168 mijë lekë që ishte më parë, pra rreth 5 mijë lekë më pak.
Pushimet, më të lira brenda Europës
Ofertat e pushimeve janë të gjitha në euro, duke i bërë ato më të lira për të gjithë ata që vendosin të udhëtojnë jashtë vendit.
Nga ana tjetër, u rezulton më shtrenjtë atyre që duan të ikin në Shtetet e Bashkuara, që duhet të shpenzojnë mesatarisht 25% më shumë për të këmbyer lekët në dollarë, në krahasim me dy-tre vjet më parë.
(XH.A/SHUPLAKA)
Discussion about this post