Fundjava duket se nuk ka qenë e qetë për kryeqytetin e më konkretisht për policinë rrugore. Janë shënuar disa raste të shkeljeve në qarkullim të drejtuesve të mjeteve. Nga ky operacion i shtrirë në disa zona të kryeqytetit kanë rënë në pranga 9 persona kryesisht për veprën ‘’drejtim i mjetit në gjendje të dehur’’. Për të tjerë janë marrë masa administrative.
Detajet e policisë:
Shërbimet e Komisariatit Rajonal të Policisë Rrugore, gjatë fundjavës janë përqëndruar në zona të ndryshme të Kryeqytetit duke zhvilluar kontrolle me Radar për matjen e shpejtësisë si dhe Drager për testet e alkoolit.
Si rezultat i këtij plani masash janë:
Arrestuar në flagrancë 8 shtetas për drejtim automjeti nën ndikimin e alkoolit. 1 shtetas për drejtim automjeti pa leje drejtimi. Si dhe janë ndëshkuar me masa administrative për OASH: 40 drejtues mjetesh me masë Administrative Plotësuese për drejtim mjeti pa vendosur rripin e sigurimit. 31 drejtues mjetesh me masë Administrative Plotësuese për drejtim mjeti nën ndikimin e alkoolit. 20 drejtues mjetesh me masë Administrative Plotësuese për drejtim mjeti, me shpejtësi tej normave të lejuara. 2 drejtues mjetesh me masë Administrative Plotësuese për drejtim mjeti në sens të kundërt me atë të lëvizjes. Policia Rrugore e Tiranës do vazhdojë të zbatojë me rigorozitet Kodin Rrugor me qëllim rritjen e parametrave të Sigurisë Rrugore.
