Gjendjen e mjerueshme të sistemit të shëndetësisë në vend po e vuan këto ditë dhe këngëtari shkodran Shyqyri Alushi, i njohur ndryshe si ‘Bilbili i këngës popullore’. Ai ndodhet prej 10 ditësh në spital, ku nuk i është mundësuar blerja e ilaçeve nga ana e shtetit.
Gazetarja e Fax News Emi Kalaja raporton se familjarët e tij i kanë marrë ilaçet me shpenzimet e tyre ndërkohë që pensioni i Alushit është minimal, dhe nuk mbulon dot kostot e këtij komplikacioni shëndetësor.
‘’Baba jem është i shtruar në spital, jemi përballur me mungesën e ilaçeve. Ble përditë e ble përditë, sot u mërzita, u revoltova, pse thashë ti paguaj unë, ai vetëm 170 mijë lekë pension ka. Të lihet Shyqyri Alushi me këtë pension është turp.
Shkodra në fakt ja ka dhënë çfarë ka pasur mundësi, ka ngecur puna në Tiranë, nuk ja japin pensionin e veçantë. Falemners për stafin e spitalit. Babai ka pësuar ishemi, jam i pakënaqur shumë me pushtetin, marrin tituj fëmijët që babai im ka mësuar dhe të mos marrë ky?!”, u shpreh i biri i këngëtarit.
Shyqyri Alushi mban titullin ‘Artist i Merituar’, dhe ‘Krenaria e qytetit të Shkodrës’ dhe është këngëtar i shquar i ahengut dhe këngës popullore qytetare shkodrane.
Discussion about this post