”Bindja Demokratike” dorëzon në Gjykatën e Tiranës kërkesën për regjistrimin si parti

Bindja Demokratike ka dorëzuar në Gjykatën e Tiranës kërkesën për t’u regjistruar si parti politike.

Pas këtij hapi, kjo forcë politike pritet që të regjistrohet dhe në Komisionin Qendror të Zgjedhjeve, duke qenë se sot është afati i fundit që kanë partitë për të qenë pjesë e zgjedhjeve të 30 Qershorit.

Në krye të Bindjes Demokratike qëndron ish-numri 2 i PD-së Astrit Patozi, si dhe një sërë eksponentësh të tjera që janë përjashtuar apo vetëpërjashtuar nga kjo forcë politike, përgjatë viteve që drejton Lulzim Basha.

Mbrëmjen e djeshme përfaqësuesit e këtij grupimi të ri politik u mblodhën në një takim në periferi të Tiranës, ku duket se kanë diskutuar dhe vijimin e aksionit të tyre, tashmë si një forcë e re alternative politike.

E gjithë kjo lëvizje e re politike është shoqëruar me një hulli të madhe informacioni, pasi fillimisht u tha se në krye të Bindjes do të qëndronte Rudina Hajdari, e cila u tërhoq në minutat e fundit.

Vetë Astrit Patozi i pyetur mbremjen e djeshme nga gazetarët për këtë parti të re, tha se do të jepte një prononcim të detajuar pas regjistrimin që do të ketë sot në KQZ.

(E.K/FAXWEB.AL)