Gjatë 10 viteve të fundit, pasuria e deklaruar e gjyqtarëve të Apelit është pesëfishuar duke arritur në 17 milionë dollarë.
Sipas BIRN, pasuritë e gjyqtarëve janë dhjetëra milionë lekë më shumë se sa justifikohen nga pagat.
Për të arritur në këtë përfundim, gazetarët investigativë kanë përpunuar të dhënat e Inspektoriat të Lartë të Deklarimit dhe Kontrollit të Pasurive dhe Konfliktit të Interesit.
Sipas këtyre të dhënave, rezulton se gjyqtarët e Apelit kanë grumbulluar rreth 2 miliardë lekë, ose 17 milionë dollarë pasuri në formë pronash të paluajtshme, kompanish biznesi, apo vlerash monetare në banka dhe në të holla.
Por, deklarimet e gjyqtarëve në ILDKP tregojnë një pesëfishim të pasurisë, ose dhjetëra milionë lekë më tepër se sa justifikohen nga pagat që kanë përftuar gjatë 11 viteve të karrierës.
Sipas rrjetit të gazetarëve investigativë, pasuria e 81 gjyqtarëve të Apelit ishte vetëm 3.2 milionë dollarë në 2004-ën.
Por në fillim të vitit 2015, ata deklarojnë se pasuria e tyre dhe e rrethit të ngushte familjar ka arritur në 17 milionë dollarë.
Sipas analizës së gazetarëve, gjysma e pasurisë së gjyqtarëve përbëhet nga investime në blerjen e pronave të patundshme. Investime që deri në fund të vitit 2014 kapin vlerën prej 8.8 milionë dollarësh.
BIRN ka bërë gjithashtu një listë me emrat e gjyqtarëve dhe pasuritë e tyre.
Në krye të kësaj liste qëndron gjyqtari, Gjin Gjoni me një pasuri prej 1.6 milionë dollarësh.
Pas tij vijnë: gjyqtarja e Apelit të Vlorës, Gjinovefa Gaba; Zeqine Sollaku, Alaudin Malaj dhe Agim Bendo i Apelit të Tiranës.
Pas këyre vijnë: Lefter Jahaj, Gurali Brahimllari i Apelit të Krimeve të Rënda, Fiqirete Mullaj, Vasil Hanxhari dhe Evgjeni Sinoimeri. Sipas të dhënave, këta dhjetë gjyqtarë zotërojnë së bashku 800 milionë lekë pasuri. (D.D/Shuplaka)
